जळगाव : भावजयीवर बलात्काराचा प्रयत्न करून तिने विरोध केल्याने तिचा गळा आवळून खून करणाऱ्या दिराला जिल्हा व सत्र न्यायालयाने जन्मठेपेची शिक्षा सुनावली. प्रवीण छगन बैरागी (२६, रा. कुंझर, ता. चाळीसगाव) असे शिक्षा झालेल्या आरोपीचे नाव आहे. पुरावा नष्ट केल्याप्रकरणी त्याची आई तथा मयत महिलेची सासू लीलाबाई बैरागी हिला तीन वर्षांची सक्तमजुरी सुनावण्यात आली. जिल्हा व सत्र न्यायाधीश पी. पी. बनकर यांनी हा निकाल दिला.
मयत महिलेचा पती सीआयएसएफमध्ये नोकरीला असल्याने ती आपल्या मुलीसह सासू व दिरासोबत गावी राहत होती. ३ जुलै २०१८ रोजी रात्री महिला मुलीसह झोपलेली असताना प्रवीणने तिच्यावर बलात्काराचा प्रयत्न केला. महिलेने विरोध केल्याने प्रवीणने तिचा गळा आवळून खून केल्याचे तपासात निष्पन्न झाले.
या प्रकरणी पोलिसांनी तपास पूर्ण करून न्यायालयात दोषारोपपत्र दाखल केले. सुनावणीदरम्यान मयत महिलेची मुलगी, तपासाधिकारी दिलीप शिरसाठ, जयपाल हिरे आणि हेमंत शिंदे यांच्या साक्षी महत्त्वपूर्ण ठरल्या. साक्षी व उपलब्ध पुराव्यांच्या आधारे न्यायालयाने आरोपींना दोषी ठरविले.
प्रवीण बैरागीला खून प्रकरणी जन्मठेप व २० हजार रुपये दंड, बलात्काराच्या प्रयत्नासाठी पाच वर्षे सक्तमजुरी व १० हजार रुपये दंड, तसेच पुरावा नष्ट केल्याप्रकरणी तीन वर्षे सक्तमजुरी व ५ हजार रुपये दंडाची शिक्षा सुनावण्यात आली. दंड न भरल्यास संबंधित शिक्षाही भोगावी लागणार आहे. तर लीलाबाई बैरागी हिला पुरावा नष्ट केल्याप्रकरणी तीन वर्षे सक्तमजुरी व ५ हजार रुपये दंडाची शिक्षा सुनावण्यात आली.
