अमळनेर : तालुक्यातील कावपिंप्री येथील दहावीत शिकणाऱ्या विद्यार्थिनीने राहत्या घरात पंख्याला साडी बांधून गळफास घेतल्याची घटना दि.५ सप्टेंबर २०२६ रोजी दुपारी २.३० वाजेच्या सुमारास घडली. कावपिंप्री येथील दीपक सोनवणे यांची भाची अनुष्का रवींद्र सपकाळे हिचे वडील १०-१२ वर्षांपासून मयत झाल्याने व आई सुरत येथे राहत असल्याने ती दीपक यांची चुलत काकू शोभाबाई बळीराम सोनवणे हिच्यासोबत कावपिंप्री येथे राहत होती. ती सर्वोदय माध्यमिक विद्यालय कावपिंप्री येथे दहावीला शिकत होती. ५ रोजी शिक्षक दिन असल्याने ती सकाळी शिक्षक बनून वर्गात शिकवत होती. दुपारी शोभाबाई अंत्ययात्रेला बाहेरगावी जात असताना अनुष्काने साडी पंख्याला बांधून गळफास घेतला. घटनास्थळी पोलिसांनी भेट दिली असता त्यांना तेथे स्टूल पडलेला दिसला. तिला खाली उतरवून दवाखान्यात नेण्यात आले असता डॉक्टरांनी मृत घोषित केले. दीपकच्या फिर्यादिवरुन अकस्मात मृत्यूची नोंद करण्यात आली असून तपास पोलीस उपनिरीक्षक कविता ठाणगे करीत आहेत.
