अमळनेर : दुधाचा फॅट वाढवण्यासाठी भेसळयुक्त दूध तयार करण्याचा कारखाना अन्न व औषध प्रशासन आणि पोलिसांनी उध्वस्त केला आहे. जानवे येथील महेश दिलीप पाटील याच्याविरुद्ध गुन्हा दाखल करण्यात आला आहे.
पोलीस निरीक्षक दत्तात्रय निकम यांनी ३० रोजी जळगावचे अन्न व औषध प्रशासन अधिकारी आकाश बोराडे याना जानवे येथे भेसळयुक्त दूध तयार करण्याचा कारखाना सुरू आहे. कारवाई करण्यासाठी या त्यानुसार अधिकारी बोराडे आणि त्यांचे सहकारी ऋषभ चव्हाण , पोलीस निरीक्षक दत्तात्रय निकम , पीएसआय नामदेव बोरकर , हेडकॉन्स्टेबल काशिनाथ पाटील , सुनील तेली ,विनोद संदानशीव , नितीन मनोरे , निलेश मोरे , सागर साळुंखे हे जानवे येथे जानवे इंदपिंप्री रस्त्यावर पोहचले असता दुपारी साडे तीन वाजता त्यांनी एका पत्री शेड मध्ये छापा टाकला त्याठिकाणी महेश दिलीप पाटील वय २७ हा मिक्सर मध्ये भेसळयुक्त दूध तयार करताना आढळून आला. तो दहा लिटर भेसळयुक्त दूध तयार करून १०० लिटर गायीच्या दुधात फॅट वाढवण्यासाठी मिसळतो आणि दूध धुळे येथे विक्रीसाठी पाठवतो असे त्याने पोलिसांना सांगितले.
पोलिसांनी त्याच्याकडून मिक्सर , सोयाबीन तेल , लोखंडी कॅन , गायीचे दूध व इतर साहित्य जप्त करून बोराडे यांच्या फिर्यादीवरून महेश विरुद्ध अन्न व सुरक्षा मानके अधिनियम २००६ चे कलम २६(१), २७(३) , ३१(१) , ३१(२) , ५९ सह भारतीय न्यायसंहिता २७४, २७५ , १२३,३१८ प्रमाणे गुन्हा दाखल करण्यात आला असून आरोपीला अटक करण्यात आली आहे. तपास हेडकॉन्स्टेबल सुनील जाधव करीत आहेत.
