अमळनेर : तालुक्यातील शिरुड येथून १६ वर्षीय अल्पवयीन मुलगी बेपत्ता झाल्याची घटना १६ ऑगस्ट रोजी रात्री घडली. याप्रकरणी अमळनेर पोलीस ठाण्यात अज्ञात व्यक्तीविरुद्ध भारतीय न्याय संहिता कलम १३७(२) अन्वये गुन्हा दाखल करण्यात आला आहे.
याबाबत मुलीच्या वडिलांनी फिर्याद दिली आहे. त्यांच्या म्हणण्यानुसार, १६ ऑगस्ट रोजी सकाळी मुलगी शेतमजुरीसाठी गेली होती. सायंकाळी साडेचारच्या सुमारास ती घरी परतली. रात्री कुटुंबीय घरी आल्यानंतर साडेसातच्या सुमारास ती घराबाहेर गेली. त्यानंतर बराच वेळ होऊनही ती घरी परतली नाही.
कुटुंबीयांनी शिरुड परिसरासह अमळनेर शहर, बसस्थानक, रेल्वेस्थानक तसेच नातेवाईकांकडे तिचा शोध घेतला. मात्र, तिचा ठावठिकाणा लागला नाही. त्यामुळे कोणीतरी अज्ञात व्यक्तीने फूस लावून तिला पळवून नेल्याचा संशय व्यक्त करण्यात आला आहे.
याप्रकरणी अमळनेर पोलीस ठाण्यात गुन्हा दाखल करण्यात आला असून वरिष्ठ अधिकाऱ्यांना माहिती देण्यात आली आहे. पोलीस निरीक्षकांच्या आदेशाने महिला पोलीस उपनिरीक्षक कविता ठाणगे पुढील तपास करीत आहेत. दाखल अंमलदार पोहेकॉ विजय भोई यांनी नोंद केली आहे.
