जळगाव : पोलीस वृत्त ऑनलाईन न्यूज ममुराबाद रोडवरील एल. के. फॉर्म येथे ऑनलाईन फसवणूक करणाऱ्या एका आंतरराज्यीय बोगस कॉल सेंटरचा पर्दाफाश झाला आहे. अपर पोलीस अधीक्षक अशोक नखाते यांच्या विशेष पथकाने आज, २८ सप्टेंबर रोजी दुपारी छापा टाकून ही धडक कारवाई केली.
या कारवाईत कॉल सेंटरच्या मालकासह एकूण आठ जणांना ताब्यात घेण्यात आले आहे. हे आरोपी स्वतःला ‘अधिकृत एजंट’ असल्याचे भासवून विविध आमिष दाखवून परदेशी नागरिकांची फसवणूक करत होते. पोलिसांनी घटनास्थळावरून ३१ लॅपटॉपसह संपूर्ण कॉल सेंटरचा सेटअप जप्त केला आहे.
ताब्यात घेतलेले बहुतांश आरोपी राज्याबाहेरील असल्यामुळे या टोळीचा आंतरराज्यीय स्तरावर फैलाव असण्याची शक्यता व्यक्त केली जात आहे. दरम्यान, फॉर्मचे स्थानिक मालक ललित कोल्हे यांनाही चौकशीसाठी ताब्यात घेण्यात आले आहे.
या फसवणूक रॅकेटच्या जाळ्याचा आणि जप्त केलेल्या डेटाच्या आधारे पोलिसांकडून सखोल चौकशी सुरू आहे. अपर पोलीस अधीक्षक अशोक नखाते यांच्या या कामगिरीमुळे जळगावातील एका मोठ्या ऑनलाईन फसवणूक टोळीचा भांडाफोड झाला आहे.
