भडगाव : पोलीस वृत्त ऑनलाईन न्यूज : तालुक्यातील पारोळा चौफुलीवरील एका चहाच्या हॉटेलमध्ये अचानक फ्रिजच्या कॉम्प्रेसरचा स्फोट होऊन हॉटेल मालकासह १३ जण जखमी झाले. जखमींपैकी काहींची प्रकृती गंभीर असून त्यांच्यावर पाचोरा, जळगाव आणि धुळे येथील रुग्णालयात उपचार सुरू आहेत.
रविवारी दुपारनंतर चहा पिण्यासाठी ग्राहकांची मोठी गर्दी झाली असताना अचानक मोठा स्फोट झाला. प्राथमिक अंदाजानुसार, हॉटेलमधील फ्रिजच्या कॉम्प्रेसरचा स्फोट झाल्यामुळे ही दुर्घटना घडली. जखमींना तातडीने भडगाव ग्रामीण रुग्णालयात दाखल करून प्राथमिक उपचार करण्यात आले. मात्र काहींची प्रकृती चिंताजनक असल्याने त्यांना पुढील उपचारासाठी पाचोरा, जळगाव तसेच धुळे येथील खासगी व शासकीय रुग्णालयात हलविण्यात आले.
रुग्णवाहिका चालक निळू पाटील, भैया पाटील, सागर पाटील व गोलू शिंदे यांनी तत्परता दाखवत जखमींना रुग्णालयात पोहोचवले. त्यांच्या या कार्यामुळे अनेकांचे प्राण वाचल्याचे नातेवाईकांनी सांगितले. दरम्यान, आमदार किशोर पाटील यांनी ग्रामीण रुग्णालय गाठून जखमींची भेट घेतली व प्रशासनाकडून सर्वतोपरी मदत मिळेल, असे आश्वासन दिले. तसेच गंभीर जखमींना आवश्यक उपचार व शासकीय योजना तातडीने लागू करण्याचे निर्देश आरोग्य यंत्रणेला दिले.
भडगाव बसस्थानक परिसरात दिवसभर मोठी वर्दळ असलेल्या पारोळा चौफुलीवर झालेल्या या स्फोटामुळे परिसरातील नागरिकांमध्ये भीतीचे वातावरण निर्माण झाले आहे. पोलिसांनी घटनास्थळी धाव घेऊन तपास सुरू केला आहे. स्फोटामुळे आगीचा भडका उडून हॉटेल मालकासह त्यांचा मुलगा व इतर ग्राहक गंभीर जखमी झाले. मोठा आवाज झाल्याने आजूबाजूचे नागरिक घाबरून घराबाहेर धावले.
जखमींमध्ये समावेश
शेख रफिक शेख रज्जाक (५०) व त्यांचा मुलगा सोहिल शेख रफिक मणियार (२८, रा. ग्रीन पार्क कॉलनी, भडगाव)
रवींद्र मुकुंदराव सोनवणे (५६, रा. बाळद रोड, भडगाव)
इकबाल शेख गनी (४०, रा. गंजी वाडा, भडगाव)
एजाजोद्दीन रियाजद्दीन मुल्ला (३२, रा. जलाली मोहल्ला, भडगाव)
मोहसीन शेख शब्बीर (३३, रा. ग्रीन पार्क कॉलनी, भडगाव)
दिलीप भटा ठाकरे (६०, रा. साईनगर, भडगाव)
भूषण प्रकाश पाटील (३४, रा. जुवार्डी, ता. भडगाव)
राजकुमार मोतीराम पवार (२८, रा. बिदर, कर्नाटक)
मयूर पदमसिंग पाटील (२८, रा. वडधे, ता. भडगाव)
राहुल बापू पाटील (४०, रा. जामदे, ता. चाळीसगाव)
अमोल गोविंद शिंदे (३४, रा. वळूज, जि. सातारा)
गजानन दिगंबर उजेड (२८, रा. वडगाव, ता. जालना)


