अमळनेर : पोलीस वृत्त न्यूज पत्रकार सदस्य व पदाधिकारी हीच संघटनेची खरी ताकद आहे. त्यांच्या कार्यक्षमता, जाणीव आणि संघटनात्मक कौशल्य वृद्धिंगत करण्याच्या उद्देशाने व्हॉईस ऑफ मीडिया तर्फे दि. १३ व १४ सप्टेंबर २०२५ रोजी सकाळी ९ वाजेपासून अमळनेर येथील ख्यातनाम श्री मंगळग्रह मंदिर परिसरात राज्यस्तरीय व्हॉईस ऑफ मीडिया पदाधिकारी केडर कॅम्प आयोजित करण्यात आला आहे.
कार्यक्रमाचे उद्घाटन माजी मंत्री तथा आमदार अनिल पाटील यांच्या हस्ते होणार असून, खासदार स्मिता वाघ प्रमुख मार्गदर्शिका असतील.
सदर शिबिरासाठी संघटनेचे संस्थापक तथा राष्ट्रीय अध्यक्ष संदीप काळे, राष्ट्रीय महासचिव दिव्या भोसले, प्रदेशाध्यक्ष अनिल म्हस्के, प्रदेश सरचिटणीस डॉ. डिगंबर महाले आणि अनेक प्रमुख पदाधिकारी उपस्थित राहणार आहेत.
व्हॉईस ऑफ मीडिया ही संस्था गेल्या काही वर्षांत पत्रकारांच्या हक्कांसाठी, सुरक्षिततेसाठी आणि व्यावसायिक सक्षमीकरणासाठी सातत्याने लढा देत आहे. ग्रामीण भागातील पत्रकारांपासून ते राष्ट्रीय आणि आंतरराष्ट्रीय स्तरावर कार्य करणाऱ्या पत्रकारांपर्यंत सर्वांना एकत्र आणणे, त्यांच्या समस्यांना वाचा फोडणे आणि शासन-प्रशासनापर्यंत प्रभावीपणे मांडणी करणे हे कार्य संघटनेमार्फत केले जात आहे. त्याचाच एक भाग म्हणून या राज्यस्तरीय केडर कॅम्पचे आयोजन करण्यात आले आहे.
या दोन दिवसीय प्रशिक्षण शिबिरात पत्रकार सुरक्षेवरील विचारमंथन, संघटनात्मक प्रशिक्षण व जबाबदाऱ्या, डिजिटल मीडिया कौशल्य कार्यशाळा, कृत्रिम बुद्धिमत्ता (AI) चा पत्रकारिता क्षेत्रावरील प्रभाव, पत्रकार-शासन संवाद धोरण, ठराव व कार्यआराखड्याची आखणी अशा महत्त्वपूर्ण सत्रांचा समावेश असेल.
दरम्यान, यावेळी उपस्थित पत्रकारांना विधानसभेचे माजी अध्यक्ष अरुणभाई गुजराथी, नाशिकचे ज्येष्ठ पत्रकार विश्वास देवकर, प्रा. अशोक पवार तसेच ज्येष्ठ पत्रकार डॉ. युवराज परदेशी यांचेही मार्गदर्शन लाभणार आहे.
