उत्तराखंड : बद्रीनाथ धामचे दर्शन घेऊन डेहराडूनच्या दिशेने परतणाऱ्या हेलिकॉप्टरचा चमोली जिल्ह्यातील जोशीमठजवळील दुर्गम डोंगराळ भागात भीषण अपघात झाला. या दुर्घटनेत पायलटसह हेलिकॉप्टरमधील सर्व सहा जणांचा मृत्यू झाला. मृतांमध्ये कर्नाटक पोलीस दलाच्या मध्यवर्ती गुन्हे शाखेत कार्यरत पोलीस निरीक्षक अरुण साळुंखे यांचा समावेश आहे. या घटनेमुळे पोलीस दलासह बेळगाव जिल्ह्यात शोककळा पसरली आहे.
उत्तराखंड नागरी विमान वाहतूक विकास प्राधिकरणाचे मुख्य कार्यकारी अधिकारी प्रतीक जैन यांनी दिलेल्या माहितीनुसार, ‘ट्रान्स भारत एव्हिएशन’ या खासगी कंपनीचे हेलिकॉप्टर बद्रीनाथहून डेहराडूनकडे निघाले होते. दुपारी सुमारे दोन वाजता चमोली जिल्ह्यातील हत्ती पर्वत परिसरात हेलिकॉप्टरचा अपघात झाला. हा भाग अत्यंत दुर्गम आणि डोंगराळ असल्याने बचावकार्यात अडथळे निर्माण झाले. घटनेची माहिती मिळताच भारतीय सेना, स्थानिक पोलीस आणि आरोग्य यंत्रणेची पथके घटनास्थळी दाखल झाली. प्रतिकूल हवामानात शोधमोहीम राबवून सर्व सहा मृतदेह बाहेर काढण्यात आले.
तीन दिवसांपूर्वीच गेले होते बद्रीनाथ यात्रेला….
या दुर्घटनेत मृत्युमुखी पडलेले पोलीस निरीक्षक अरुण साळुंखे हे कर्नाटकातील बेळगाव जिल्ह्यातील अथाणी तालुक्यातील आरताळ गावचे रहिवासी होते. २००७ च्या बॅचचे कर्नाटक पोलीस अधिकारी असलेल्या साळुंखे यांनी यापूर्वी दिल्लीत गुप्तचर विभागातही सेवा बजावली होती. सध्या ते बंगळुरूच्या मध्यवर्ती गुन्हे शाखेत पोलीस निरीक्षक म्हणून कार्यरत होते.
साळुंखे यांच्या अपघाती निधनाची बातमी समजताच त्यांच्या आरताळ गावासह संपूर्ण बेळगाव जिल्ह्यावर शोककळा पसरली. नातेवाइकांनी दिलेल्या माहितीनुसार, दुपारी साडेतीनच्या सुमारास अपघाताची बातमी मिळाली. सुरुवातीला ते बेपत्ता असल्याचे सांगण्यात आले होते. तीन दिवसांपूर्वीच ते बद्रीनाथ यात्रेसाठी गेले होते आणि शुक्रवारी परतणार होते. मात्र, परतीच्या प्रवासातच काळाने त्यांच्यावर घाला घातल्याने कुटुंबीयांवर दुःखाचा डोंगर कोसळला.
