नाशिक:शहरात एका २८ वर्षीय तरुणाने राहत्या खोलीत गळफास घेऊन जीवनयात्रा संपवल्याची दुर्दैवी घटना उघडकीस आली आहे. मृत तरुण हा इलेक्ट्रिकल डिप्लोमा करून एका खासगी कंपनीत नोकरी करत होता. या प्रकरणी मृताच्या वडिलांच्या फिर्यादीवरून आत्महत्येस प्रवृत्त केल्याप्रकरणी एमआयडीसी पोलिस ठाण्यात एका तरुणीसह चौघांविरुद्ध गुन्हा नोंदवण्यात आला आहे.
पोलिसांनी दिलेल्या माहितीनुसार पवन राजेंद्र देसले (वय २८, मूळ रा. अमळनेर) असे मृत तरुणाचे नाव आहे. पवन हा नाशिक येथे नोकरी करत होता. तो पंधरा दिवसांनी गावी आई-वडिलांना भेटण्यासाठी जायचा. २५ ऑक्टोबर रोजी दुपारी ३ वाजण्याच्या सुमारास त्याच्या नाशिकच्या खोलीत राहणारा हर्षल जैन याने मित्राच्या फोनवरून वडिलांना फोन करून पवनने खोलीत गळफास घेतल्याची माहिती दिली. त्यानंतर नातेवाइकांनी घटनास्थळी धाव घेऊन खात्री केली असता, हा दुर्दैवी प्रकार समोर आला. त्याने आत्महत्येपूर्वी लिहिलेल्या चिठ्ठीनुसार त्याचे वडील राजेंद्र देसले यांनी पोलिसांत फिर्याद दिली आहे. पवन २० ऑक्टोबर रोजी गावी गेला असताना मानसिक तणावाखाली असल्याचे त्याच्या आई-वडिलांच्या निदर्शनास आले. आई-वडिलांनी त्याला विश्वासात घेऊन विचारणा केली होती. त्याने ओळखीतील व्यक्ती संशयित जयदीप पाटील, हेमंत जाधव अन्य दोन तरुणी हे चारही जण सातत्याने त्रास देत असून, धमकावत असल्याचे सांगितले होते. या त्रासाला व धमकीला कंटाळूनच पवनने टोकाचे पाऊल उचलल्याचे फिर्यादीत नमूद आहे. त्यानुसार चौघांविरुद्ध एमआयडीसी पोलिस ठाण्यात गुन्हा नोंद असून, पुढील तपास सुरू आहे.
त्यांना सोडू नका’
यांच्यामुळे मी सर्व काही करतो आहे. हे वारंवार मला त्रास देत होते. मला जयदीपने मारले होते. दोन-तीनदा तरुणीच्या सांगणे वरून. दुसऱ्या तरुणीला मी खूप पैसे दिले आहे. पण, तिने मला ‘फोन-पे’ वरही ब्लॉक केले आहे. म्हणून काही ट्रान्सॅक्शन नाही दिसणार. नावे घेत सांगितले की यांना सोडू नका…’, असे आत्महत्येपूर्वीच्या चिठ्ठीत नावासहित नमूद आहे.
