अमळनेर : पती आणि मुलाला फाशी देऊन जीवे मारण्याची धमकी देत विवाहितेवर अत्याचार केल्याप्रकरणी सानेनगर येथील आनंदा वसंत पाटील याच्याविरुद्ध अमळनेर पोलिस ठाण्यात बलात्कार व ॲट्रॉसिटीचा गुन्हा दाखल करण्यात आला आहे.
पीडित महिलेला आनंदा पाटील याच्या ओळखीतून भाड्याने घर मिळाले होते. महिलेचे पती बाहेरगावी असताना गेल्या दोन वर्षांपासून आरोपी तिच्या घरी जाऊन प्रेमसंबंध असल्याचे सांगत धमकी देऊन शारीरिक संबंध ठेवत असल्याचे फिर्यादीत नमूद आहे. ९ तारखेला सायंकाळी ६ वाजता महिलेचा मुलगा क्लासला गेला असताना आरोपीने पती व मुलाला फाशी देऊन मारण्याची धमकी दिली आणि तिच्या इच्छेविरुद्ध शारीरिक संबंध ठेवल्याचा आरोप आहे.
पती घरी आल्यानंतर महिलेने त्याला व भावाला घडलेला प्रकार सांगितला. याप्रकरणी अमळनेर पोलिस ठाण्यात भारतीय न्याय संहितेच्या कलम ६४, ३५२, ३५१(४) तसेच अनुसूचित जाती-जमाती अत्याचार प्रतिबंधक कायद्याच्या कलम ३(१)(आर)(एस) अन्वये गुन्हा दाखल करण्यात आला आहे. पुढील तपास डीवायएसपी विनायक कोते करीत आहेत.
