धुळे : मुलीच्या लग्नासाठी मुलगा पाहून आनंदाने घरी परतणाऱ्या माने कुटुंबावर काळाने घाला घातला. मालेगाव तालुक्यातील टिंगरी गावाजवळ वनपट फाट्यावर झालेल्या भीषण अपघातात आई-वडिलांसह त्यांच्या तरुण मुलीचा जागीच मृत्यू झाला. राजू माने, बालाबाई माने आणि भटाबाई माने अशी मृतांची नावे आहेत. या घटनेमुळे धुळे तालुक्यातील तिसगाव-ढंडाणे गावावर शोककळा पसरली आहे.
मिळालेल्या माहितीनुसार, तिसगाव-ढंडाणे येथील राजू माने हे कुटुंबासह मुलीच्या लग्नासाठी स्थळ पाहण्याकरिता नांदगाव येथे गेले होते. मुलगा पाहण्याचा कार्यक्रम आनंदात पार पडल्यानंतर माने कुटुंब कारने घराकडे परतत होते. दहिदीमार्गे कुसुंबा रस्त्याने प्रवास सुरू असताना टिंगरी गावाजवळील वनपट फाट्यावर एका पिकअप वाहनाने ओव्हरटेक करण्याचा प्रयत्न केला. यावेळी चालकाचे वाहनावरील नियंत्रण सुटल्याने पिकअपने माने यांच्या कारला जोरदार धडक दिली.
धडक इतकी भीषण होती की, कारचा अक्षरशः चुराडा झाला. या अपघातात राजू माने, त्यांची पत्नी बालाबाई आणि मुलगी भटाबाई यांचा जागीच मृत्यू झाला. मुलीच्या विवाहासाठी आनंदाने सुरू झालेला प्रवास संपूर्ण कुटुंबासाठी अखेरचा ठरला. एकाच कुटुंबातील तिघांचा दुर्दैवी मृत्यू झाल्याने परिसरात हळहळ व्यक्त होत आहे.
