जळगाव : पोलीस वृत्त न्यूज जिल्ह्यातील काही भागात झालेल्या अतिवृष्टीमुळे शेतकऱ्यांचे मोठे नुकसान झाले असून, अनेक जनावरेही पाण्यात वाहून गेली आहेत. आज (शुक्रवार) पाचोरा तालुक्यातील वडगाव टेक येथे हिवरानदीला अचानक पूर आल्याने मामी आणि भाची वाहून गेल्याची धक्कादायक घटना घडली.
यामध्ये 35 वर्षीय मामीला ग्रामस्थांच्या मदतीने सुखरूप वाचवण्यात आले, मात्र 15 वर्षीय भाची पुराच्या पाण्यात वाहून गेल्याची हृदयद्रावक घटना घडली.
नदी पार करताना अपघात
शुक्रवारी दुपारी दोन वाजेच्या सुमारास निकिता भालेराव (वय 15) आणि तिची मामी सरला खरे (वय 35) शेतातून परत येत होत्या. हिवरानदी ओलांडत असताना अचानक पाण्याचा प्रवाह वाढला आणि दोघी वाहून गेल्या. तत्काळ धाव घेतलेल्या ग्रामस्थांनी सरला खरे यांना सुरक्षित बाहेर काढले. मात्र निकिता पाण्यात वाहून गेली.
घटनेची माहिती मिळताच महसूल विभाग आणि नगरपालिकेचे कर्मचारी घटनास्थळी दाखल झाले. तीन तासांपासून निकिताचा शोध सुरू असून ग्रामस्थही मदतकार्य करत आहेत.
नातीच्या धक्क्याने आजोबांचा मृत्यू
दरम्यान, नात वाहून गेल्याची बातमी कळताच निकिताचे आजोबा श्यामराव खरे (वय 65) यांना मोठा धक्का बसला. या धक्क्याने त्यांचा जागीच मृत्यू झाला. त्यामुळे एकाच कुटुंबावर दुहेरी संकट कोसळले असून गावात शोककळा पसरली आहे.
प्रशासनावर ग्रामस्थांचा रोष
घटनेनंतर दोन तासांपर्यंत कोणतीही शासकीय मदत पोहोचली नसल्याने ग्रामस्थांमध्ये संताप व्यक्त होत आहे. अतिवृष्टीमुळे नदी-नाले धोकादायक पातळीवर असतानाही प्रशासन सज्ज नसल्याचं चित्र पुन्हा एकदा समोर आलं आहे.
