पोलीस वृत्त ऑनलाईन: अवकाळी मुसळधार पावसामुळे पाकिस्तानातील रावी, सतलज आणि चिनाब नद्यांना मोठा पूर आला आहे. या पुरामुळे पंजाब प्रांतातील 25 जिल्ह्यांमधील 4100 हून अधिक गावे जलमय झाली असून तब्बल 4.1 कोटी लोकांना याचा फटका बसला आहे. 26 ऑगस्टपासून आतापर्यंत 56 जणांचा मृत्यू झाला असून अनेकजण बेघर झाले आहेत. काहीजण बेपत्ता असून त्यांचा शोध अद्याप सुरू आहे.
प्रांतीय आपत्ती व्यवस्थापन प्राधिकरणाचे (PDMA) महासंचालक इरफान अली काठिया यांनी दिलेल्या माहितीनुसार, प्रभावित भागात 425 मदत छावण्या उभारण्यात आल्या आहेत. येथे विस्थापितांना तात्पुरता निवारा आणि अन्न पुरवले जात आहे. तसेच, 500 हून अधिक वैद्यकीय छावण्यांमधून आतापर्यंत 1.75 लाख रुग्णांवर उपचार करण्यात आले आहेत. बचाव पथकांनी 2 कोटींपेक्षा जास्त नागरिकांना सुरक्षित स्थळी हलवले असून 1.5 कोटी जनावरेही वाचवण्यात आली आहेत.
स्थानिक प्रशासनाकडून पूरस्थितीवर नियंत्रण मिळवण्यासाठी विशेष कार्ययोजना आखण्यात आली आहे. चिनाब नदीवरील काही बंधाऱ्यांवरील दबाव कमी झाला असला तरी, नवीन पाण्याच्या प्रवाहामुळे पातळी पुन्हा वाढण्याची शक्यता व्यक्त करण्यात येत आहे.
राष्ट्रीय आपत्ती व्यवस्थापन प्राधिकरणाच्या (NDMA) माहितीनुसार, यावर्षी मान्सून सुरू झाल्यापासून पाकिस्तानभरात मुसळधार पावसामुळे आणि पुरामुळे 900 हून अधिक मृत्यू झाले असून, 1000 हून अधिक लोक जखमी झाले आहेत
