अमळनेर : तालुक्यातील पिंगळवाडे येथे बिबट्याने म्हशीचे पारडू फस्त केल्याची घटना १८ रोजी पहाटे घडली.
पिंगळवाडे येथील विलास पाटील या शेतकऱ्याचे गावाबाहेर लगतच शेतात खळे असून त्यांची जनावरे तेथेच बांधलेली असतात. १८ रोजी सकाळी त्यांना एक ते दीड वर्षाचे म्हशीचे पारडू अर्धवट खाल्लेले दिसून आले. दोन दिवसांपूर्वी देखील एक रानडुक्कर खाल्लेले आढळून आले होते. शीतल देशमुख यांनी वनपाल गुलाब पिंजारी याना कळवल्यानंन्तर त्यांनी पशु वैद्यकीय अधिकारी डॉ संजय वाठोळे , पोलीस पाटील गजेंद्र पाटील यांनी घटनास्थळी भेट देऊन पंचनामा केला. मृत जनावराचे शवविच्छेदन करून तेथेच अंत्यसंस्कार करण्यात आले. त्याठिकाणी पुसटसा बिबट्याचा पावलांचा ठसा दिसून आल्याने पारडू बिबट्याने झाल्याचे स्पष्ट झाले.
पिंगळवाडे परिसर नदी जंगलाचा असल्याने शेतकऱ्यांनी शेतात जाताना गटागटाने जावे , आपली जनावरे गावात बंदिस्त जागी बांधावेत. आणि बिबट्याला पळवण्यासाठी फटाक्यांचे आवाज करावेत, पत्र्याचे डबे वाजवावेत- गुलाब पिंजारी वनपाल अमळनेर
