जळगाव : पोलीस वृत्त न्यूज; जिल्ह्यातील जामनेर तालुक्यातील मुंदखेडा गावात घरगुती वादातून थरारक घटना घडली. किरकोळ कारणावरून झालेल्या वादाच्या पार्श्वभूमीवर संतापलेल्या पतीने पत्नीवर धारदार शस्त्राने वार करून तिची हत्या केली. या घटनेमुळे परिसरात मोठी खळबळ उडाली आहे.
ही घटना १८ सप्टेंबर रोजी दुपारी चार वाजेच्या सुमारास घडली. मृत महिलेचे नाव अनिता ऊर्फ मीनाबाई भिल असून आरोपी पतीचे नाव बाळू भिल असे आहे. वादाच्या भरात बाळू याने पत्नीवर चाकूने वार केले. गंभीर जखमी अवस्थेत नागरिकांनी अनिताला जामनेर उपजिल्हा रुग्णालयात दाखल केले, मात्र उपचारापूर्वीच तिचा मृत्यू झाला.
घटनेनंतर बाळू हा पती घटनास्थळावरून फरार झाला होता. माहिती मिळताच पोलीस निरीक्षक मुरलीधर कासार यांनी पथकासह घटनास्थळी धाव घेत तपास सुरू केला. अवघ्या काही तासांतच पोलिसांनी आरोपीला शोधून काढत ताब्यात घेतले.
या प्रकरणी आरोपी बाळू भिलविरोधात खुनाचा गुन्हा दाखल करण्यात आला असून पोलिसांचा पुढील तपास सुरू आहे.
