अमळनेर : पोलीस वृत्त ऑनलाईन न्यूज तालुक्यातील शिरूड गावात डेंग्यूचा रुग्ण आढळल्याने ग्रामस्थांमध्ये चिंता पसरली आहे. एका तीन वर्षांच्या लहान मुलीला गेल्या तीन-चार दिवसांपासून तापाने त्रस्त असल्यामुळे तिला प्रथम अमळनेर येथील खाजगी रुग्णालयात दाखल करण्यात आले. मात्र प्रकृती गंभीर झाल्याने तिला पुढे धुळे येथील खासगी रुग्णालयात हलवण्यात आले. तपासणीत तिच्यावर डेंग्यूची लागण झाल्याचे निष्पन्न झाले असून सध्या तिची प्रकृती स्थिर असून उपचार सुरू आहेत.
या घटनेनंतर आरोग्य विभाग सतर्क झाला असून गावात डेंग्यू प्रतिबंधक उपाययोजना राबविण्याची तयारी सुरू आहे. नागरिकांनी घराभोवती व अंगणात पाणी साचू न देणे, डेंग्यूची लक्षणे जाणवल्यास त्वरित डॉक्टरांचा सल्ला घेणे, तसेच स्वच्छतेकडे विशेष लक्ष देण्याचे आवाहन करण्यात आले आहे.
दरम्यान, आरोग्य विभागाने “कोरडा दिवस” पाळण्याचे आवाहन केले आहे. आठवड्यातून एक दिवस सर्वांनी घरातील पाणी साठवणुकीची भांडी, टाक्या रिकाम्या करून स्वच्छ धुवाव्यात, अशी सूचना करण्यात आली आहे.
डेंग्यू प्रतिबंधासाठी आवश्यक उपाययोजना:
घराभोवती पाणी साचू देऊ नका
पाणी साठवणुकीची भांडी झाकून ठेवा
डेंग्यूच्या डासांचा प्रादुर्भाव टाळण्यासाठी आठवड्यातून एक “कोरडा दिवस” पाळा
ताप, अंगदुखी, डोळ्यामागे वेदना यांसारखी लक्षणे दिसल्यास विलंब न लावता डॉक्टरांकडे जा
ही मोहिम वैद्यकीय अधिकारी डॉ. संजय रानाळकर यांच्या मार्गदर्शनाखाली व डॉ. अतुल चौधरी यांच्या नेतृत्वाखाली राबविण्यात येत आहे.
शिरूडसह परिसरातील नागरिकांनी डेंग्यू प्रतिबंधासाठी जागरूक राहून प्रशासनाला सहकार्य करण्याचे आवाहन करण्यात आले आहे.
