अमळनेर: पोलीस वृत्त न्यूज तालुक्यातील आर्डी येथून दोन अल्पवयीन मुलींना फुस लावून पळवून नेल्याची घटना ९ रोजी मध्यरात्री साडेबारा वाजता घडली. याप्रकरणी अपहरणाचा गुन्हा दाखल करण्यात आला आहे.
याबाबतची माहिती अशी की, तालुक्यातील आर्डी येथील १४ वर्षे ६ महिने वयाची मुलगी आणि तिची १५ वर्षे ८ महिने वयाची भाची या दोघी ८ रोजी रात्री शेजारी त्यांच्या काकांकडे झोपायला गेल्या होत्या. ९ रोजी मध्यरात्री त्या दोघींनी शौचास जाऊन येतो, असे सांगून बाहेर गेल्या. बराच वेळ झाला तरी त्या परतल्या नाहीत. त्यानंतर शेजारील महिलेने येऊन सांगितले की तुझी मुलगी आणि भाची कुठेतरी निघून गेल्या आहेत.
संपूर्ण परिसरात शोधाशोध करूनही त्या सापडल्या नाहीत. म्हणून अमळनेर पोलिस स्टेशनला फिर्याद दिली असता, अज्ञात व्यक्तीविरुद्ध भारतीय दंड विधान कलम ३६३ अन्वये गुन्हा दाखल करण्यात आला आहे. पुढील तपास पोलीस उपनिरीक्षक युवराज बागुल करीत आहेत.
