पाचाेरा : प्रतिनिधी
शहरातील मोंढाळे रोडवरील गजानन नगरभागातील आचारी असलेल्या तरुणाने राहत्या घरी गळफास घेत आत्महत्या केल्याची घटना साेमवारी दुपारी एक वाजता उघडकीस आल्याने परिसरात खळबळ उडाली. किरण रघुनाथ महाजन (वय ३५) रा. गजानन नगर, मोंढाळे रोड, पाचोरा असे मृताचे नाव आहे. या घटनेप्रकरणी येथील पोलिसांत अकस्मात मृत्यूची नोंद करण्यात आली.
आत्महत्येचे कारण मात्र कळू शकले नाही. शहरातील रेल्वे स्थानका नजीक असलेल्या हाॅटेल चंद्रलोकमध्ये आचारी म्हणून काम करणारे किरण महाजन साेमवारी दैनंदिन काम आटोपून दुपारी १२.३० वाजेच्या सुमारास गजानन नगरातील आपल्या घरी आले. दरम्यान काही वेळानंतर त्यांच्या वहिनींनी त्यास जेवणासाठी बोलवले असता किरण याच्या खोलीचा दरवाजा बंद होता. वारंवार आवाज देवूनही खोलीतून प्रतिसाद मिळत नसल्याने त्यांनी खिडकीतून आत डोकावून बघितले असता किरण गळफास घेतलेल्या अवस्थेत दिसताच त्यांनी एकच आक्रोश केला.
