धरणगाव: (पोलीस वृत्त- ऑनलाईन) गारखेडा(garkheda) व बाभळे(Babhle) ग्रुप ग्रामपंचायत ग्रामसेवकाला अडीच हजाराची लाच घेतांना जळगाव लाचलुचपत प्रतिबंधक विभागाच्या पथकाने रंगेहात अटक केली आहे. अनिल नारायण गायकवाड, वय-५०, ग्रामसेवक, गारखेडा व बाभळे ग्रुप ग्रामपंचायत(Grampanchaut) कार्यालय, ता.धरणगाव जि.जळगाव (वर्ग-३), असे ताब्यात घेतलेल्या ग्रामसेवकाचे नाव आहे.
तक्रारदार हे गारखेडा येथील रहीवासी असून त्यांनी गारखेडा व बाभळे ग्रुप ग्रामपंचायतीमधील ग्रामसेवक अनिल गायकवाड (Anil Gayakwad) यांच्याकडे ग्रामपंचायती मध्ये सन २०१५- २०२० या कालावधी दरम्यान ग्रामपंचायत अंतर्गत झालेल्या विविध योजनांच्या कामाचे झालेले लेखापरीक्षण बाबतची माहिती ही माहितीच्या अधिकाराचा अर्ज करून मागितलेली होती. सदरची माहिती ही वेळेत न मिळाल्याने तक्रारदार यांना सदर माहिती देण्याच्या मोबदल्यात गारखेडा व बाभळे ग्रुप ग्रामपंचायतीचे ग्रामसेवक गायकवाड यांनी तक्रारदार यांच्याकडे पंचासमक्ष प्रथम ३ हजार रुपये व तडजोडीअंती अडीच हजार रुपये लाचेची मागणी केली. सदर लाच मागणी केलेली रक्कम धरणगाव अमळनेर रोडवरील सिंधु ढाबा येथे पंचासमक्ष स्वतःस्विकारतांना त्यांना रंगेहाथ पकडण्यात आले आहे. ग्रामसेवक गायकवाड यांच्यावर धरणगाव पोलीस स्टेशन येथे गुन्हा दाखल करण्याची कारवाई सुरु आहे.
