जळगाव: जळगावातून धुळेकडे जाणाऱ्या महामार्गावर एक अपघात झाल्याने एका तरुणीला आपला जीव गमवावा लागला आहे. राष्ट्रीय महामार्गावर आज दुपारी वाजेच्या सुमारास भरधाव डंपरने एक बळी घेतला आहे. मोपेड दुचाकीला दिलेल्या धडकेत तरुणी जागीच ठार झाली तर तिचा भाऊ हा बचावला आहे.
साविस्तर वृत असे की जळगाव शहरातील शिव कॉलनी रेल्वे उड्डाण पुलाजवळ भरधाव डंपरने दुचाकीला जोरदार धडक देताच दुचाकीवर बसलेल्या तरुणीचा जागीच मृत्यू झाल्याची घटना काल दुपारी चार वाजेच्या सुमारास घडली आहे. जळगावकडून धुळ्याकडे जाणारा डंपर क्रमांक (एमएच १९ सीवाय ३३११) हा शिव कॉलनी कडून रेल्वे उड्डाणपुलाकडे जात होता. त्यावेळेस पुढे जाणारी मोपेड दुचाकी (एमएच १९ सी ७१६९) याला डंपरने मागून जोरदार धडक दिली. यात दुचाकीवर बसलेल्या मनस्वी उर्फ ताऊ सुभाष सोनवणे (२०) रा. खोटे नगर, जळगाव या तरुणीचा जागीच मृत्यू झाला. तर या अपघातात तरुणीचा भाऊ नचिकेत सुभाष सोनवणे (२५) रा. खोटे नगर, जळगाव हा थोडक्यात बचावला आहे. ही दुर्घटना आज दुपारी ४ वाजेच्या सुमारास घडली आहे. घटनेची माहिती मिळताच शहर वाहतूक शाखेचे पोलीस कर्मचारी, रामानंदनगर पोलीस ठाण्याचे पोलीस कर्मचारी आणि जिल्हापेठ पोलीस ठाण्याचे कर्मचारी यांनी घटनास्थळी धाव घेऊन मृतदेहाचा पंचनामा केला. दरम्यान रामानंदनगर पोलिसांनी डंपर ताब्यात घेतला असून याबाबत गुन्हा दाखल करण्याचे काम सुरू आहे.
