अमळनेर: पोलीस वृत्त न्यूजव : अवैधरित्या गॅस रिफिलिंगचा व्यवसाय करू देण्यासाठी दरमहा १५ हजारांची लाच द्यावी लागेल, अन्यथा गुन्हा दाखल करू, अशी धमकी देत तडजोडीअंती १२ हजारांची लाच खाजगी पानटपरी चालकाच्या माध्यमातून स्वीकारताना अमळनेर पोलिस ठाण्याच्या दोन कर्मचार्यांना धुळे एसीबीने मंगळवारी रात्री उशिरा अटक केली. या कारवाईनंतर पोलिस वर्तुळात प्रचंड खळबळ उडाली आहे.
अटक आरोपींत पोलिस कॉन्स्टेबल अमोल राजेंद्र पाटील (३६), जितेंद्र रमणलाल निकुंभे (३३) तसेच पानटपरी चालक उमेश भटू बारी (४६, सहारा टॉवर, लोकमान्य शाळेजवळ, अमळनेर) यांचा समावेश आहे.
कारवाईबाबत प्रचंड गोपनीयता
खास सूत्रांच्या माहितीनुसार, तक्रारदार अमळनेरच्या धुळे रोडवरील पाचपावली मंदिराजवळील एका टपरीत एलपीजी गॅस सिलिंडरमधून वाहनांमध्ये गॅस भरण्याचे काम करतो. हा अवैध व्यवसाय करायचा असल्यास दरमहा १५ हजार रुपये हप्ता द्यावा लागेल, अन्यथा तुझ्यावर अवैधरित्या वाहनात गॅस भरण्याचा गुन्हा दाखल करू, अशी धमकी दोन्ही पोलिस कर्मचार्यांनी दिली होती.
तक्रारदाराचा इशारा आणि आरोपी जाळ्यात
तक्रारदाराने धुळे एसीबीकडे तक्रार दिल्यानंतर एसीबीचे पथक मंगळवारी दुपारपासून अमळनेरात दाखल झाले. ठरल्याप्रमाणे आरोपींनी लाचेची रक्कम बहादरपूर रोडवरील पाचपावली मंदिरासमोरील मिनाबाई ठाकरे शॉपिंग कॉम्प्लेक्समधील स्वराज्य पान दुकानाचे चालक उमेश बारी यांच्याकडे देण्यास सांगितले.
बारी यांनी लाच स्वीकारताच तक्रारदाराने पथकाला सांकेतिक इशारा दिला. त्यानंतर आधी पानटपरी चालकाला आणि मग दोन्ही पोलिस कर्मचार्यांना रंगेहाथ अटक करण्यात आली.
यशस्वी सापळा
धुळे एसीबीचे डॅशिंग पोलिस उपअधीक्षक सचिन साळुंखे यांच्या नेतृत्वाखाली पोलिस निरीक्षक पद्मावती कलाल, पोलिस निरीक्षक यशवंत बोरसे, हवालदार rajan कदम, मुकेश अहिरे, प्रवीण मोरे, संतोष पावरा, प्रशांत बागुल, मकरंद पाटील, प्रवीण पाटील, सागर शिर्के, प्रितेश चौधरी, रेश्मा परदेशी, हवालदार सुधीर मोरे, जगदीश बडगुजर आदींच्या पथकाने ही कारवाई यशस्वीरीत्या पार पाडली.
