पोलीस वृत्त न्यूज: कर्नाटकातील हसन जिल्ह्यात एक भीषण अपघात घडला आहे. होलेनारसीपुरा येथील मोसाले होसाहल्लीजवळ एका भरधाव मालवाहू ट्रकने थेट गणेश विसर्जन मिरवणुकीत घुसून आठ जणांचा बळी घेतला, तसेच अनेकांना गंभीर जखमी केले.
गणेश विसर्जन मिरवणुकीत तल्लीन झालेल्या भक्तांवर अचानक भरधाव ट्रक धडकला. या धडकेत घटनास्थळीच पाच जणांचा मृत्यू झाला, तर रुग्णालयात उपचारादरम्यान आणखी तिघांचा मृत्यू झाला. या दुर्घटनेत अनेकजण जखमी असून त्यांच्यावर रुग्णालयात उपचार सुरू आहेत.
घटनेची माहिती मिळताच पोलिसांनी तातडीने घटनास्थळी धाव घेतली आणि जखमींना रुग्णालयात हलवले. ट्रक चालकाविरुद्ध गुन्हा दाखल करण्यात आला असून पुढील तपास सुरू आहे. ट्रक चालक नशेत होता का, वाहनात काही तांत्रिक बिघाड झाला होता का, की अन्य काही कारण होते, याचा शोध पोलिस घेत आहेत.
दरम्यान, या दुर्घटनेवर केंद्रीय मंत्री एच.डी. कुमारस्वामी यांनी शोक व्यक्त केला आहे. त्यांनी म्हटले, “ही अतिशय दुर्दैवी घटना आहे. मृतांच्या आत्म्यांना शांती लाभो आणि शोकाकुल कुटुंबांना हे दुःख सहन करण्याची शक्ती मिळो. सर्व जखमींना लवकर बरे वाटावे यासाठी मी प्रार्थना करतो. तसेच राज्य सरकारने जखमींना योग्य व मोफत उपचार मिळावेत यासाठी तातडीने उपाययोजना कराव्यात.”


