सातारा : पोलीस वृत्त ऑनलाईन जिल्हा शासकीय रुग्णालयात शुक्रवारी संध्याकाळी घडलेली घटना गिनीज बुक ऑफ वर्ल्ड रेकॉर्डला टक्कर देणारी ठरली आहे. कोरेगाव तालुक्यात माहेरी आलेल्या काजल विकास खाकुर्डिया (वय 27) या तरुणीने एकाचवेळी चार बाळांना जन्म दिला आहे. त्यात तीन मुली आणि एका मुलाचा समावेश आहे.
विशेष म्हणजे, याआधी पाच वर्षांपूर्वी काजलला तीन जुळी बाळं झाली होती. म्हणजेच एका मातेच्या कुशीत आजवर तब्बल सात बाळांचा जन्म झाला आहे. या घटनेने साताऱ्यातच नव्हे तर संपूर्ण जिल्ह्यात आश्चर्याची लाट पसरली आहे.
मूळ गुजरातमधील रहिवासी असलेले विकास खाकुर्डिया हे सध्या सासवड येथे गवंडी म्हणून काम करतात. त्यांच्या घरी आता सात देवदूतांचा गोड गोंगाट सुरू झाला असून नातेवाईकांसह संपूर्ण कुटुंब आनंदात आहे.
ही अवघड डिलिव्हरी सिझेरियन शस्त्रक्रियेद्वारे यशस्वीरित्या पार पडली. डॉ. देसाई, डॉ. सलमा इनामदार, डॉ. खडतरे, डॉ. झेंडे, डॉ. दिपाली राठोड यांच्यासह संपूर्ण वैद्यकीय पथकाने अपार मेहनत घेऊन आई व सर्व बाळं ठणठणीत असल्याची माहिती दिली.
सुरुवातीला धाकधूक होती, मात्र शस्त्रक्रिया सुरळीत पार पडल्याने नातेवाईक आणि डॉक्टरांनी सुटकेचा निश्वास टाकला. या घटनेने जिल्हा रुग्णालयात एकप्रकारे आनंदसोहळ्याचे वातावरण निर्माण झाले.
आता साताऱ्यात चर्चेचा विषय ठरला आहे – ही घटना खरोखरच गिनीज बुक ऑफ वर्ल्ड रेकॉर्डमध्ये नोंद होऊ शकेल का? पण एक मात्र खरे, एका गवंड्याच्या घरात सात देवदूतांचा आगमन सोहळा साऱ्यांना थक्क करून गेला आहे.
