अमळनेर : पोलीस वृत्त ऑनलाईनतालुक्यातील लोण खुर्द येथे सततच्या नाफ्याअभावी आणि प्रचंड कर्जाच्या बोजामुळे शेतकऱ्याने गळफास घेऊन आत्महत्या केल्याची धक्कादायक घटना ७ सप्टेंबर रोजी घडली.
मृत शेतकरी समाधान विजय पाटील (वय ३६) यांच्याकडे फक्त दोन एकर शेती होती. घरात वृद्ध आई, पत्नी आणि दोन लहान मुले अशी जबाबदारी असूनही शेतीवर पुरेसा उत्पन्नाचा आधार नसल्याने ते कायम चिंतेत असत. नातेवाईकांनी शोध घेतला असता, शेतातच पाटील यांचे प्रेत आढळले. गावकऱ्यांच्या मदतीने प्रेत बाहेर काढून शवविच्छेदनासाठी अमळनेर ग्रामीण रुग्णालयात हलवण्यात आले.
सततच्या नापिकीतून त्यांच्यावरचे कर्ज वाढत गेले. खासगी फायनान्स कंपन्यांकडून घेतलेली उसनवारी व उच्च व्याजदराची देणी यामुळे मानसिक ताण वाढला होता. त्यातूनच समाधान पाटील यांनी टोकाचा निर्णय घेतल्याचे सांगण्यात येते. विशेष म्हणजे, याआधी त्यांच्या लहान भावानेही आठ वर्षांपूर्वी आत्महत्या केली होती.
या घटनेनंतर पाटील कुटुंबावर दुःखाचा डोंगर कोसळला असून घरात वृद्ध आई, पत्नी, १२ वर्षांचा मुलगा आणि १० वर्षांची मुलगी अशी चौघेच सदस्य उरले आहेत. घरातील कर्ता व्यक्ती गमावल्याने हे कुटुंब उघड्यावर आले आहे. त्यामुळे प्रशासनाने तातडीने या कुटुंबाला मदत करावी, अशी मागणी ग्रामस्थांकडून होत आहे.
या प्रकरणी मारखड पोलीस ठाण्यात अकस्मात मृत्यूची नोंद करण्यात आली असून पुढील तपास सुरू आहे.
