नाशिक: इंद्रकुंड भागात घरगुती पीठ गिरणीच्या बेल्टमध्ये अडकल्याने ३ वर्षीय बालकाचा मृत्यू झाल्याची दुर्दैवी घटना घडली आहे. रिहान उमेश शर्मा (रा.हिमालय हाऊस, इंद्रकुंड, पंचवटी) असे मृत बालकाचे नाव असून याप्रकरणी पंचवटी पोलिस ठाण्यात मृत्यूची नोंद करण्यात आली आहे.
शर्मा कुटुंबियांनी गुरूवारी दळण दळण्यासाठी घरगुती आटा चक्की मशिन सुरू केले होते. दळण टाकून श्रीमती शर्मा नेहमीप्रमाणे घरकामात व्यस्त असतांना ही घटना घडली. रिहान घरात खेळत असतांना गिरणीजवळ गेला. खेळता खेळता तो मोटारीच्या बेल्टमध्ये अडकला( While playing, he got stuck in the belt of the car)अचानक आवाज झाल्याने शर्मा यांनी धाव घेतली असता सदरचा प्रकार समोर आला.
या घटनेत रिहानचे शरीर बेल्टमध्ये अडकल्याने कोवळया हाडांचा चेंदामेंदा झाला होता. कुटुंबियांनी त्यास तात्काळ खासगी हॉस्पिटलमध्ये दाखल केले. मात्र त्याची अनेक हाडे फॅक्चर असल्याचे समोर आले आहे. डॉक्टरांकडून त्याच्यावर औषधोपचार सुरू असतांना रात्री त्याचा मृत्यू झाला. याबाबत डॉ. धवल यांनी दिलेल्या खबरीवरून पोलिस दप्तरी मृत्यूची नोंद करण्यात आली आहे. अधिक तपास हवालदार शेवाळे करीत आहे.
