जळगाव (पाचोरा तालुका) : पोलीस वृत्त न्यूज
पाचोरा तालुक्यातील सातगाव डोंगरी परिसरात आज दुपारच्या सुमारास झालेल्या ढगफुटी सदृश्य पावसाने भीषण परिस्थिती निर्माण झाली.
मुसळधार पावसामुळे दगडी नदीला पूर आला. त्यामुळे गावातील वीज उपकेंद्र, घरे तसेच शेतजमिनी पाण्याखाली गेल्या. गावाजवळील सातगाव डोंगरी धरणदेखील ओव्हरफ्लो झाले असून शेतांमध्ये मोठ्या प्रमाणात पाणी शिरले आहे. यामुळे उभ्या पिकांचे मोठे नुकसान झाले तर काही ठिकाणी जमिनीची माती वाहून गेली आहे.
अचानक आलेल्या पुरामुळे गावकऱ्यांचे जनजीवन विस्कळीत झाले असून ग्रामस्थ व शेतकऱ्यांचे मोठे आर्थिक नुकसान झाले आहे. प्रशासनाकडून तात्काळ पंचनामे करून शेतकऱ्यांना नुकसानभरपाई द्यावी, अशी मागणी स्थानिक ग्रामस्थांकडून जोर धरत आहे.
