जळगाव : पोलीस वृत्त न्यूज: राज्यात सुरू असलेल्या मुसळधार पावसाने जळगाव जिल्ह्यातील पाचोरा व जामनेर तालुक्यांत कहर केला आहे. पाचोरा तालुक्यातील सातगाव डोंगरी परिसरात मध्यरात्री ढगफुटीसदृश्य पावसाने थैमान घातले. त्यामुळे दगडी नदीसह परिसरातील नदी-नाले तुडुंब भरून वाहू लागले असून सातगाव डोंगरीहून मराठवाड्याकडे जाणारा महत्त्वाचा रस्ता वाहून गेला आहे.
वडगाव (कडे), शिंदाड, वाणेगाव, निंभोरी, राजुरी, वाडी शेवाळे, सार्वे, पिंप्री या गावांमध्ये पुराचे पाणी शिरले आहे. अनेक घरांमध्ये संसारोपयोगी साहित्याचे नुकसान झाले असून ग्रामस्थांनी भीतीपोटी संपूर्ण रात्र जागून काढली.
दरम्यान, जामनेर तालुक्यातील नेरी-चिंचखेडा परिसरातही मुसळधार पावसामुळे पूरस्थिती निर्माण झाली आहे. अनेक गावांचा संपर्क तुटला असून ग्रामस्थ अडचणीत आले आहेत.
या पुराच्या पाण्यात शेकडो जनावरे वाहून गेल्याची माहिती समोर आली आहे. पशुधन वाहून गेल्याने शेतकऱ्यांचे मोठे आर्थिक नुकसान झाले असून शेतकरी हवालदिल झाले आहेत. अद्याप पाणी न ओसरल्यामुळे भीतीचे वातावरण कायम आहे.
